தூய்மைப் பணியாளர்கள் போராட்டம்: சென்னையில் கைதான 950 பேர் விடுவிப்பு
தூய்மைப் பணியை தனியாருக்கு வழங்கக் கூடாது, பணி நிரந்தரம் தேவை உள்ளிட்ட கோரிக்கைகளை வலியுறுத்தி தொடர்ந்த போராட்டத்தில் தூய்மை பணியாளர்கள் நள்ளிரவில் குண்டுக்கட்டாகக் கைது செய்யப்பட்டனர். அவர்களும், அவர்களுக்கு ஆதரவாக போராடியவர்களும் விடுவிக்கப்பட்டனர்.
சென்னை மாநகராட்சி மண்டலம் 5, 6 பகுதிகளுக்கான தூய்மைப் பணி தனியார் நிறுவனத்திற்கு வழங்கப்படுவதை எதிர்த்து, பணி நிரந்தரம் உள்ளிட்ட கோரிக்கைகளை வலியுறுத்தி, 2 மண்டல தூய்மைப் பணியாளர்கள் (என்யூஎல்எம் பிரிவு) 13 நாட்களாக ரிப்பன் மாளிகை முன் தொடர் போராட்டம் மேற்கொண்டனர். அரசு தரப்புடன் நடைபெற்ற பல சுற்றுப் பேச்சுவார்த்தைகள் தோல்வியடைந்தன.
இதற்கிடையே, “போராட்டம் என்ற பெயரில் நடைபாதை, சாலையை மறிப்பதை அனுமதிக்க முடியாது” என உயர் நீதிமன்ற தலைமை நீதிபதி தெரிவித்தார். ரிப்பன் மாளிகை முன்பாக போராட்டத்தில் ஈடுபட்ட தூய்மைப் பணியாளர்களை உடனடியாக அப்புறப்படுத்த போலீஸாருக்கு உத்தரவிட்டார். இதையடுத்து, காவல் துறை புதன் கிழமை மாலை போலீஸாருக்கு போராட்டக்காரர்களை கலைந்து செல்லுமாறு அறிவுறுத்தியது.
நீதிமன்ற உத்தரவைச் சுட்டிக்காட்டியும், போலீஸார் போராட்டக்காரர்களுடன் பேச்சுவார்த்தை நடத்தினர். ஆனால் யாரும் கலைந்து செல்லவில்லை. அமைச்சர்கள் கே.என்.நேரு மற்றும் சேகர்பாபு போராட்டக்குழுவினருடன் பேச்சுவார்த்தை நடத்தினார்கள்; உடன்பாடு எட்டவில்லை. இதையடுத்து, போலீஸார் கைது நடவடிக்கைக்கு இறங்கினர்.
நள்ளிரவு 11.45 மணியளவில், தூய்மைப் பணியாளர்கள் குண்டுக்கட்டாக போலீஸாரால் கைது செய்யப்பட்டனர். போலீஸாருடன் அவர்கள் வாக்குவாதம் செய்ததால் பரபரப்பு ஏற்பட்டது.
போராட்டத்தில் ஈடுபட்ட 700 பெண்கள் மற்றும் ஆதரவாளர்கள் உள்பட, சுமார் 950 பேர் கைது செய்யப்பட்டு 30 மாநகர அரசு பேருந்துகள் மூலம் சைதாப்பேட்டை, வேளச்சேரி, நீலாங்கரை, தரமணி, தாம்பரம் உள்ளிட்ட 12 மண்டபம் மற்றும் சமூக நலக்கூடங்களுக்கு அழைத்துச் சென்று தங்க வைக்கப்பட்டனர்.
கைது செய்யப்பட்ட தூய்மை பணியாளர்களை இன்று காலை கலைந்து செல்லுமாறு போலீஸார் அறிவுறுத்தினர்; ஆனால் யாரும் கிளம்பவில்லை. மாலை 5 மணிக்கு மேல், மண்டபங்கள் மற்றும் சமூக நலக்கூடங்களில் இருந்து தூய்மை பணியாளர்கள் அனைவரும் விடுவிக்கப்பட்டனர்.
இந்நிலையில், ரிப்பன் மாளிகை உள்ளே மற்றும் வெளியே தூய்மைப் பணியாளர்கள் மீண்டும் போராட்டத்தில் ஈடுபடாதபடி, 100-க்கும் மேற்பட்ட போலீஸார் குவிக்கப்பட்டு கண்காணிப்பு அதிகரிக்கப்பட்டது. உள்ளே வரும் அனைத்து வாகனங்களையும் சோதனை செய்து அனுமதிக்கின்றனர்.
முதல்வர் ஸ்டாலின் கூறுவது:
முதல்வர் ஸ்டாலின் சமூக வலைதளத்தில்:
“நாளும் நம் நகரங்கள் இயங்க நள்ளிரவு, புயல், மழை, வெள்ளம் என எந்நேரமும் ஓயாமல் உழைக்கும் தூய்மைப் பணியாளர்களின் மாண்பினை நமது திராவிட மாடல் அரசு ஒருபோதும் விட்டுக் கொடுக்காது. கடந்த 4 ஆண்டுகளில் நிறைவேற்றிய பல நலத்திட்டங்களோடு, அவர்களின் நியாயமான கோரிக்கைகளையும் பரிசீலித்து:
- தூய்மைப் பணியாளர்களுக்குக் காலை உணவு
- குழந்தைகளுக்கு உயர்கல்வி ஊக்கத்தொகை
- குடும்பத்தினருக்குச் சுயதொழில் உதவி
- நலவாழ்வுக்காக ரூ.10 லட்சம் காப்பீடு
- 30 ஆயிரம் வீடுகள்/குடியிருப்புகள்
- பணியின்போது இறக்க நேரிட்டால் ரூ.10 லட்சம் நிவாரண நிதி
- புதிய தனித்திட்ட நலத் திட்டங்கள்
செயல்படுத்தவுள்ளோம். இது என்றும் எளியோரின் அரசு, உங்களுடன் உங்களுக்காக நிற்கும்” என்று முதல்வர் ஸ்டாலின் தெரிவித்தார்.
