மேட்டூர் அணையில் தண்ணீர் வெளியேற்றம் 40 ஆயிரம் கனஅடியாக குறைப்பு
மேட்டூர் அணை கடந்த ஜூலை 25ஆம் தேதி இந்தாண்டில் நான்காவது முறையாக நிரம்பிய நிலையில், அதன் பின் அணைக்கு வரும் நீருடன் சமமாக காவிரியில் தண்ணீர் திறக்கப்பட்டு வந்தது.
இந்த நிலையில், அணைக்கு கடந்த முந்தைய நாள் விநாடிக்கு 1,10,500 கனஅடி அளவில் நீர் வந்திருந்தது. ஆனால் நேற்று இரவு வரத்து 40,500 கனஅடியாகக் குறைந்தது.
இதையடுத்து, அணையிலிருந்து வெளியேற்றப்படும் தண்ணீரின் அளவும் குறைக்கப்பட்டது. முன்பு 1.10 லட்சம் கனஅடி தண்ணீர் வெளியேற்றப்பட்ட நிலையில், தற்போது அது 40 ஆயிரம் கனஅடியாக குறைக்கப்பட்டுள்ளது.
அதேசமயம், கால்வாய் பாசனத்துக்காக 500 கனஅடி தண்ணீர் திறக்கப்பட்டு வருகிறது.
மேட்டூர் அணையின் நீர்மட்டம் நேற்று 120 அடியாக இருந்தது. தருமபுரி மாவட்டத்தில் உள்ள ஒகேனக்கல் காவிரியில், முன்தினம் 1.25 லட்சம் கனஅடி அளவில் நீர்வரத்து இருந்த நிலையில், அது நேற்று மாலை 57 ஆயிரம் கனஅடியாக குறைந்ததாகவும் தெரிவிக்கப்பட்டுள்ளது.