குரூப்-4 தேர்வுக்கான விடைத்தாள் பெட்டிகள் பாதுகாப்புடன் எடுத்துச்செல்லப்பட்டன: டிஎன்பிஎஸ்சி கட்டுப்பாட்டு அதிகாரி தெரிவிப்பு

குரூப்-4 தேர்வு முடிவடைந்ததன் பின்னர், அனைத்து தேர்வு மையங்களிலிருந்தும் விடைத்தாள் தொகுப்புகள் ஜூலை 14-ம் தேதி பாதுகாப்புடன் சென்னைக்கு கொண்டு வரப்பட்டதாக, தமிழ்நாடு அரசுப் பணியாளர் தேர்வாணையத்தின் (டிஎன்பிஎஸ்சி) தேர்வு கட்டுப்பாட்டு அதிகாரி அறிவித்துள்ளார். எந்த மையத்திலும் பிரச்சனை எதுவும் ஏற்படவில்லை என்றும் அவர் தெரிவித்தார்.

தமிழக அரசின் பல்வேறு துறைகளில் இளநிலை உதவியாளர், தட்டச்சர், சுருக்கெழுத்து தட்டச்சர் மற்றும் கிராம நிர்வாக அலுவலர் போன்ற பணியிடங்களை நிரப்ப மொத்தம் 3,935 காலியிடங்களுக்கு தகுதியானவர்கள் தேர்ந்தெடுக்கப்பட உள்ளனர். இதற்கான ஒருங்கிணைந்த குரூப்-4 எழுத்துத் தேர்வு ஜூலை 12-ம் தேதி சனிக்கிழமை நடத்தப்பட்டது. இந்தத் தேர்வில் 11 லட்சத்து 48 ஆயிரத்திற்கும் அதிகமானோர் பங்கேற்றனர்.

இந்த நிலையில், சேலம் மாவட்டத்தில் உள்ள தேர்வு மையம் ஒன்றில் விடைத்தாள் தொகுப்புகள் வைக்கப்பட்ட பெட்டி சேதமடைந்ததுபோல் தோன்றும் புகைப்படங்கள் வெளியாகி, சமூக வலைதளங்களில் பரவியது. இதனால் தேர்வெழுதியவர்கள் குழப்பத்தில் உள்ளனர்.

இது குறித்து டிஎன்பிஎஸ்சி தேர்வு கட்டுப்பாட்டு அதிகாரி ஏ. சண்முகசுந்தரம் வெளியிட்ட செய்திக்குறிப்பில், “ஜூலை 12-ம் தேதி தேர்வு முடிந்ததும், அனைத்து விடைத்தாள்களும் பாதுகாப்பு நடைமுறைகளுடன் சீல் வைக்கப்பட்ட இரும்பு பெட்டிகளில் 13-ம் தேதி காலை டிஎன்பிஎஸ்சி அலுவலகத்திற்கு பாதுகாப்பாக கொண்டு வரப்பட்டன. எந்தவிதமான தவறுகளும் நடந்ததில்லை,” என தெரிவிக்கப்பட்டுள்ளது.

விடைத்தாள்கள் அட்டைப்பெட்டிகளில் கொண்டு வரப்பட்டன என்ற தகவல் தவறானது. எல்லா விடைத்தாள்களும் இரும்பு பெட்டிகளில் வைத்து சீலிடப்பட்டு, 24 மணி நேர கண்காணிப்பில், பாதுகாப்பாகவும் வீடியோ பதிவுடன் டிஎன்பிஎஸ்சி அலுவலகத்துக்கு கொண்டு வரப்பட்டன.

சமூக வலைதளங்களில் பகிரப்பட்ட புகைப்படங்களில் காணப்படும் பெட்டிகள், வினாத்தாள்கள் எடுத்துவைக்கப்பட்ட காலி அட்டைப்பெட்டிகள் மற்றும் பயன்படுத்தப்படாத வினாத்தாள்கள் அடங்கிய பெட்டிகள் ஆகும். இவை தேர்வுக்கு மேலதிகமாக அச்சிடப்பட்டதால், வழக்கப்படி அந்தந்த மாவட்டங்களில் சேமிக்கப்படுகின்றன.

தேர்வுகள் முடிந்ததும், அவை மாவட்ட கருவூலங்கள் வழியாக மாவட்ட நூலகங்கள் மற்றும் வேலைவாய்ப்பு அலுவலகங்களுக்கு அனுப்பப்படுவது வழக்கமான நடைமுறையாகும். ஏற்கெனவே அறிவிக்கப்பட்டவாறு, குரூப்-4 தேர்வு முடிவுகள் 3 மாதங்களுக்குள் வெளியிடப்படும் எனவும் அவர் தெரிவித்துள்ளார்.