சென்னை கிராண்ட் மாஸ்டர்ஸ் செஸ் – வின்சென்ட் கீமர் சாம்பியன் பட்டம் உறுதி
சென்னையில் உள்ள நட்சத்திர ஓட்டலில் நடைபெற்று வரும் சென்னை கிராண்ட் மாஸ்டர்ஸ் சதுரங்கப் போட்டியின் 8-வது நாளான நேற்று, 8-வது சுற்று ஆட்டங்கள் நடைபெற்றன.
புள்ளிகள் பட்டியலில் 5.5 புள்ளிகளுடன் முதலிடத்தில் இருந்த ஜெர்மனியின் வின்சென்ட் கீமர், எஞ்சிய இரண்டு சுற்றுகளையும் டிராவில் முடித்தாலே சாம்பியன் பட்டம் பெறும் நிலையில், நெதர்லாந்தின் ஜோர்டன் வான் பாரஸ்டை எதிர்கொண்டார். வெள்ளைக் காய்களுடன் விளையாடிய கீமர், கருப்பு காய்களுடன் விளையாடிய ஜோர்டனுடன் 59-வது நகர்த்தலில் டிரா செய்தார். இதன் மூலம் 6 புள்ளிகளை பெற்ற அவர், இன்னும் ஒரு சுற்று மீதமிருக்கும்போதே சாம்பியன் பட்டத்தை கைப்பற்றினார்.
அவருக்கு அடுத்தபடியாக இந்தியாவின் அர்ஜுன் எரிகைசி 4.5 புள்ளிகளுடன் 2-வது இடத்தில் இருப்பதால், இறுதி சுற்றில் எவரும் கீமரின் புள்ளியை எட்ட முடியாது. சாம்பியன் பட்டத்தை உறுதி செய்த கீமர், லைவ் செஸ் ரேட்டிங்கில் 2746.5 புள்ளிகளுடன் 10-வது இடத்திற்கு முன்னேறினார். இன்று இறுதி சுற்றில் அவர் அமெரிக்காவின் ரே ராப்சனை எதிர்கொள்கிறார்.
மற்ற போட்டிகளில், அனிஷ் கிரி – அவோண்டர் லியாங், அர்ஜுன் எரிகைசி – விதித் குஜராத்தி, வி. பிரணவ் – ரே ராப்சன், கார்த்திகேயன் முரளி – நிஹால் சரின் ஆகிய ஆட்டங்களும் டிராவில் முடிந்தன.
சேலஞ்சர்ஸ் பிரிவு
முழுவதும் இந்திய வீரர்கள் பங்கேற்ற சேலஞ்சர்ஸ் பிரிவின் 8-வது சுற்றில், ஜி. பி. ஹர்ஷ்வர்தன் – அதிபன் பாஸ்கரன் ஆட்டத்தில், 81-வது நகர்த்தலில் அதிபன் வெற்றி பெற்றார். ஹரிகா துரோணவல்லி – எம். பிரனேஷ் ஆட்டத்தில், 42-வது நகர்த்தலில் பிரனேஷ் வென்றார். இதன் மூலம் அவர் 6.5 புள்ளிகளுடன் முதலிடம் பிடித்தார்.
அபிமன்யு புராணிக் – திப்தாயன் கோஷ் ஆட்டத்தில், 68-வது நகர்த்தலில் அபிமன்யு வெற்றி பெற்று 6 புள்ளிகளுடன் 2-வது இடத்தை பிடித்தார். லியோன் லூக் மென்டோன்கா – பா. இனியன் ஆட்டம் 34-வது நகர்த்தலில் டிரா ஆனது. இதனால் லியோன் 6 புள்ளிகளுடன் 3-வது இடத்துக்கு சரிந்தார். ஆர். வைஷாலி – ஆர்யன் சோப்ரா ஆட்டத்தில், 64-வது நகர்த்தலில் ஆர்யன் வெற்றி பெற்றார்.
இன்று நடைபெறும் இறுதி சுற்றில், பட்டத்தை கைப்பற்ற எம். பிரனேஷ், அபிமன்யு புராணிக், லியோன் லூக் மென்டோன்கா ஆகியோருக்கு இடையே கடும் போட்டி இருக்கும்.
8 சுற்றுகளின் புள்ளிகள் நிலை
- மாஸ்டர்ஸ் பிரிவு: வின்சென்ட் கீமர் 6, அர்ஜுன் எரிகைசி 4.5, கார்த்திகேயன் முரளி 4.5, அனிஷ் கிரி 4, ஜோர்டன் வான் பாரஸ்ட் 4, அவோண்டர் லியாங் 4, விதித் குஜராத்தி 3.5, நிஹால் சரின் 3.5, வி. பிரணவ் 3, ரே ராப்சன் 3.
- சேலஞ்சர்ஸ் பிரிவு: எம். பிரனேஷ் 6.5, அபிமன்யு புராணிக் 6, லியோன் லூக் மென்டோன்கா 6, அதிபன் பாஸ்கரன் 5, பா. இனியன் 4.5, திப்தாயன் கோஷ் 3.5, ஆர்யன் சோப்ரா 3, ஜி. பி. ஹர்ஷ்வர்தன் 3, ஹரிகா துரோணவல்லி 1.5, ஆர். வைஷாலி 1.
