போயிங் விமானங்களின் எரிபொருள் சுவிட்சுகளில் எந்த கோளாறும் இல்லை: ஏர் இந்தியா விளக்கம்

போயிங் 787 மற்றும் போயிங் 737 வகை விமானங்களில் உள்ள எரிபொருள் கட்டுப்பாட்டு சுவிட்சுகள் (Fuel Control Switch – FCS) சீராக இயங்கி வருகின்றன என்றும், எந்தவிதப் பழுதும் இல்லையென்றும் ஏர் இந்தியா நிறுவனம் தெளிவுபடுத்தியுள்ளது.

ஜூன் 12-ஆம் தேதி, அகமதாபாத்திலிருந்து லண்டனுக்கு புறப்பட்ட ஏர் இந்தியா போயிங் 787 விமானம், அச்சமயத்தில் ஒரு மருத்துவக் கல்லூரி விடுதிக்குத் தாக்கி விபத்துக்குள்ளானது. அதில் விமானத்தில் பயணம் செய்த 241 பேரும், விடுதியில் இருந்த 19 பேரும் உயிரிழந்து, மொத்தமாக 260 பேர் உயிரிழந்ததைத் தொடர்ந்து, இச்சம்பவம் நாடு முழுவதும் அதிர்ச்சியை ஏற்படுத்தியது.

இந்தக் கோரமான சம்பவத்திற்குப் பின்னர், சிவில் விமான போக்குவரத்து ஆணையம் (DGCA) உத்தரவிட, ஏர் இந்தியா நிறுவனம் தனது போயிங் 787 மற்றும் 737 வகை விமானங்களில் எரிபொருள் சுவிட்சுகளின் செயல்பாடுகள் குறித்து பரிசோதனை மேற்கொண்டது.

ஏர் இந்தியா விளக்கம்:

அந்த பரிசோதனை தொடர்பாக வெளியிட்டுள்ள அறிக்கையில் ஏர் இந்தியா தெரிவித்துள்ளதாவது:

“எங்கள் விமானங்களில் உள்ள எரிபொருள் கட்டுப்பாட்டு சுவிட்சுகளின் செயல்பாடுகள் முழுமையாக சீரானவையாகவே உள்ளன. எந்தவித கோளாறும் கண்டறியப்படவில்லை. DGCA-வின் வழிகாட்டுதலின் கீழ் ஆய்வுகளை தொடங்கி, அவற்றை தீர்மானிக்கப்பட்ட காலத்துக்குள் முடித்தோம். இது தொடர்பான தகவல்களை ஆணையத்திடம் சமர்ப்பித்துள்ளோம். பயணிகள் மற்றும் பணியாளர்களின் பாதுகாப்பை உறுதியாக பேணும் நோக்கத்துடன் இந்த நடவடிக்கைகள் மேற்கொள்ளப்பட்டன.”

விமான எண்ணிக்கை:

• ஏர் இந்தியா: 33 போயிங் 787 விமானங்கள்
• ஏர் இந்தியா எக்ஸ்பிரஸ்: 75 போயிங் 737 விமானங்கள்

  இவ்விரு நிறுவனங்களின் விமானங்களிலும் சோதனைகள் மேற்கொள்ளப்பட்டுள்ளதாக தெரிவிக்கப்பட்டுள்ளது.

விசாரணையின் பின்னணி:

முன்னதாக, அகமதாபாத் விமான விபத்து தொடர்பான முதற்கட்ட 15 பக்க விசாரணை அறிக்கையில், விமானம் புறப்பட்ட நொடிக்குள் எரிபொருள் சுவிட்சுகள் தானாக ‘ஆஃப்’ நிலையில் சென்றது என்பது விபத்துக்குக் காரணமாக கூறப்பட்டிருந்தது. இதைத் தொடர்ந்து, விமானங்களின் சிஸ்டங்களை விரிவாக பரிசோதிக்கும் வேலைகளில் ஏர் இந்தியா ஈடுபட்டது.