‘பான் இந்தியா’ படங்களில் வில்லன்களாக மாறும் முன்னணி ஹீரோக்கள்!

‘பான் இந்தியா’ படங்களில் வில்லன்களாக மாறும் முன்னணி ஹீரோக்கள்!

பல முன்னணி நடிகர்கள் நடிக்கும் திரைப்படங்கள் தற்போது ‘பான் இந்தியா’ வடிவில் பல மொழிகளில் வெளியாகுவதால், ஹீரோ – வில்லன் எனும் இடைவெளி நாளுக்கு நாள் குறைந்து வருகிறது. ஒரு மொழியில் ஹீரோவாக நடித்தவர் மற்றொரு மொழியில் வில்லனாக நடிப்பதைக் கதாநாயகர்களும் இயக்குநர்களும் திறந்த மனதுடன் ஏற்க தொடங்கியுள்ளனர். ஹீரோவுக்கு நிகராக வலிமை வாய்ந்த வில்லன்களை தேட வேண்டிய தேவை, இதற்கும் ஒரு முக்கிய காரணமாகக் கூறப்படுகிறது. மிகுந்த செலவில் தயாராகும் ‘மல்டி ஸ்டாரர்’ படங்களில் இது இன்றியமையாததாகிவிட்டது.

முன்னாடி தங்களது ஹீரோ இமேஜை காக்க எண்ணி எதிர்மறை கதாபாத்திரங்களில் நடிக்க தயங்கிய சில ஹீரோக்கள், இப்போது அந்த ஆளுமையை ஓரமாக வைத்து, வில்லனாக நடிக்க துணிந்துவருகின்றனர். இந்த ஒரு ட்ரெண்ட் புதியதல்ல; ஆனால் ‘பாகுபலி’ படத்திற்குப் பிறகு இது வேகமாகப் பரவத் தொடங்கியுள்ளது என. ஹீரோவாக நடித்துவந்த ராணா, ‘பாகுபலி’யில் எதிர்மறை கதாபாத்திரத்தில் கலக்கி, நல்ல வரவேற்பும் பெற்றார். அந்த பாத்திரமும் ஹீரோவுக்கு நிகராக இருந்ததே.

‘விக்ரம்’ படத்தில் சூர்யா ‘ரோலக்ஸ்’ எனும் சிறிய ஆனால் தாக்கம் உள்ள எதிர்மறை கதாபாத்திரத்தில் நடித்து பரபரப்பை ஏற்படுத்தினார். விஜய் சேதுபதி, ‘மாஸ்டர்’ படத்தில் பவானியாகவும், ‘ஜவான்’ படத்தில் காளியாகவும் வில்லனாக நடித்தபோது, அவருடைய அந்த நடிப்புக்கு பாராட்டுகள் கிடைத்தன. ஹீரோவாக நடித்திருந்தாலும் எதிர்மறை பாத்திரங்களில் அவர் இன்னும் அழுத்தமான உணர்வுகளை வெளிப்படுத்தியுள்ளார். இதேபோல், ‘கல்கி 2898 ஏ.டி’யில் கமல்ஹாசன் வில்லனாக நடித்துள்ளார். அவருடைய முழுமையான வில்லன் தோற்றம் அதன் இரண்டாம் பாகத்தில் வெளியாகும் என்று படக்குழு தெரிவித்துள்ளது.

‘புஷ்பா 2’ படத்தில் ஃபஹத் பாசில் வில்லனாக தன் நடிப்பால் பாராட்டு பெற்றுள்ளார். பாலிவுட் படம் ‘அனிமல்’ல், பாபி தியோல் வில்லனாகவே பாராட்டப்பட்டார். பின் அவர், சூர்யாவின் ‘கங்குவா’விலும் விஜய்யின் ‘ஜனநாயகனி’யிலும் நடித்துள்ளார். ‘சலார்’ படத்தில் ஹீரோவுடன் நண்பனாக நடித்த பிருத்விராஜ், அதன் இரண்டாம் பாகத்தில் வில்லனாக வெளிவரவிருக்கிறார்.

சயிப் அலி கான் ‘தேவரா’வில், சஞ்சய் தத் ‘கேஜிஎப் 2’, ‘லியோ’ போன்ற படங்களில் வில்லனாக நடிக்கத் தேர்ந்தெடுக்கப்பட்டுள்ளனர். ‘வார் 2’ படத்தில் ஜூனியர் என்டிஆர், ஹிருத்திக் ரோஷனுடன் மோதும் வில்லனாக நடித்துள்ளார். யாஷ், ‘ராமாயணம்’ படத்தில் ராவணனாக நடித்துவருகிறார்.

தனுஷின் ‘இட்லி கடை’ படத்தில் அருண்விஜய் வில்லனாக நடித்துள்ளார். ஏற்கனவே அவர் அஜித்தின் ‘என்னை அறிந்தால்’ படத்தில் எதிர்மறை பாத்திரத்தில் நடித்துள்ளார். சிவகார்த்திகேயனின் ‘பராசக்தி’யில் ரவி மோகன் வில்லனாகிறார். சில படங்களில் வில்லனாக நடித்த எஸ்.ஜே. சூர்யா தற்போது ஹீரோவாக திரும்பியுள்ளார்.

இப்போது ஹீரோக்கள் வில்லன்களாக மாறுவதால், அவர்கள் எதிர்மறை உணர்வுகளை வெளிப்படுத்தும் மற்றுமொரு சந்தர்ப்பத்தை பெறுகிறார்கள். இதுவே, வழக்கமான ஹீரோவாக வில்லனை எதிர்த்து நடிக்கின்ற போக்கு ஒரு பக்கமாக போகிறது.

ரஜினிகாந்தின் ‘கூலி’ உள்ளிட்ட பல மல்டி-ஸ்டார் படங்களில், ஒவ்வொரு நடிகருக்குமான கதாபாத்திரம் வலிமை வாய்ந்ததாக இருப்பதை உறுதிப்படுத்தும் வேலை ‘ஸ்கிரிப்ட் ரைட்டர்கள்’மீது உள்ளது. இது பார்வையாளர்களுக்கு ஒரு புதிய அனுபவத்தையும், தயாரிப்பாளர்களுக்குப் பணம் வசூலிக்க வாய்ப்பையும் தருகிறது என்கிறார்கள்.

மேலும், சில ஹீரோக்கள் குறைந்த நாட்கள் படப்பிடிப்புக்கு வரும்படியும், அதற்கேற்ப அதிகக் கூலியும் பெறுவதாலும் இந்த வகை எதிர்மறை பாத்திரங்களை அவர்களே விரும்பி தேர்ந்தெடுப்பதாகக் கூறப்படுகிறது.