தோல்வியாதி நீங்க அருள் புரியும் நாகப்பட்டினம் குமரன் | ஞாயிறு தரிசனம்

மெய்கண்டமூர்த்தி தல வரலாறு:

18ஆம் நூற்றாண்டின் கடைசிப் பகுதியில் வசித்த அழகுமுத்து என்ற பேச்சுத் தகுதியில்லாத ஒருவர், இந்தக் கோயிலில் தோட்டத் தொழிலாளராக இருந்தார். குமரனின் நிவேதனப் பிரசாதத்தையே உணவாகக் கொண்டு வாழ்ந்தார். ஒருநாள் அர்த்தஜாம பூஜைக்குப் பின், மணி அடித்ததும் அவரிடம் தெரிவித்துவிட்டு, அர்ச்சகர் பிரசாதத்தை அருகில் வைத்து சென்றார். அந்தப் பிரசாதமே அவருக்குத் தேவைப்பட்ட உணவாக இருந்தது. இரவு ஒரு மணி அளவில் விழித்த அவருக்கு மிகுந்த பசியாக இருந்தது. பேச முடியாத அவர் பூட்டிய கோயிலுக்குள் எங்கும் அலைந்து திரிந்தார்.

அழகுமுத்துவின் தவிப்பான அழுகுரலைக் கேட்ட முருகன், குழந்தையின் உருவத்தில் வந்து பஞ்சாமிர்தம் அளித்ததோடு, அவருக்கு பேச்சுத் திறனையும் அளித்தார். பின், அழகுமுத்து தன் கணீர் குரலால் பல கோயில்களில் பாடல்களைப் பாடினார். முதிர்வடைந்த காலத்தில், வைகாசி விசாகத் தினத்தன்று சிதம்பர நடராஜர் கோயிலின் ஆயிரம் கால் மண்டபத்தில் உயிர் நீங்கினார். அவரது ஆன்மா நேராக நாகை மெய்கண்ட மூர்த்தி முருகன் சந்நிதியில் வந்து சேர்ந்தது. அந்த மாலை சாயங்கால தீபாராதனையின் போது முருகனுடன் ஒன்றிணைந்ததாகக் கூறப்படுகிறது. அதன்பின்பு ஒவ்வொரு ஆண்டும் வைகாசி விசாக தினத்தில் “ஐக்கியத் திருவிழா” எனும் விழா நடைபெறுகிறது.

கோயில் சிறப்பம்சம்:

நாகை மாவட்டத்தில் உள்ள 12 சிவாலயங்களில் ஒன்று கார்முகீஸ்வரர் கோயில். இங்கு மேகராஜா வழிபட்டதாகக் கூறப்படுகிறது. காலச்சுழற்சியில் இங்கு உள்ள சிலைகள் மணற்பரப்பில் புதைந்தன. புதுச்சேரியில் மொழிபெயர்ப்பாளராக இருந்த துபாஷி ஆனந்தரங்கம் பிள்ளைக்கு கனவில் தோன்றி, தாம் உறையும் இடத்தைச் சுட்டிக்காட்டிய முருகன், நாகை காயாரோகணேஸ்வரர் கோயிலின் தெற்குவீதியில் கோயிலை நிறுவ உத்தரவிட்டதாகக் கூறப்படுகிறது. அதன் படி இந்த முருகன் கோயில் கட்டப்பட்டது. இங்கு தோல் சம்பந்தப்பட்ட நோய்கள் நீங்க அருள்புரியும் முருகனாக வழிபடப்படுகிறது.

இடம்: நாகை – தஞ்சாவூர் சாலையில் அமைந்துள்ள நாலுகால் மண்டபம் பேருந்து நிறுத்தத்திற்கு அருகிலேயே இந்தக் கோயில் அமைந்துள்ளது.

கோயில் நேரம்: காலை 7 முதல் 12 மணி வரை, மாலை 5 முதல் இரவு 9.30 மணி வரை திறந்திருக்கும்.