‘பாமக’ பெயரும் கொடியும் பயன்படுத்த கூடாது – அன்புமணிக்கு எதிராக டிஜிபியிடம் ராமதாஸ் தரப்பில் புகார்
அன்புமணி முன்னெடுத்து வரும் ‘தமிழக மக்கள் உரிமை மீட்பு நடைபயணத்துக்கு’ தடை விதிக்க வேண்டும் என, பாமக நிறுவனர் ராமதாஸ் சார்பில் மாநில காவல் தலைவரிடம் (டிஜிபி) மனு அளிக்கப்பட்டுள்ளது.
‘தமிழக மக்கள் உரிமை மீட்பு பயணம்’ என்ற பெயரில் பாமக தலைவர் அன்புமணி ஜூலை 25ஆம் தேதி முதல் தமிழகம் முழுவதும் சுற்றுப்பயணம் மேற்கொண்டு பொதுமக்கள் மற்றும் கட்சியினருடன் சந்திப்பு நடத்த உள்ளார். இந்நிலையில், தனது அனுமதியின்றி பாமக பெயரும் கொடியும் பயன்படுத்தப்படுவது மற்றும் நிர்வாகிகளை சந்திக்கும் வகையிலான பயணத்தைத் தடுக்க வேண்டும் எனக் கோரி, பாமக நிறுவனர் ராமதாஸ் சார்பில் டிஜிபிக்கு முறையீடு செய்யப்பட்டுள்ளது.
சமூக சமத்துவம், அமைதியான வாழ்க்கை, வேலைவாய்ப்பு, வேளாண்மை, உணவு, வளர்ச்சி, கல்வி போன்ற 10 முக்கியமான அடிப்படை உரிமைகள் மக்களுக்கு மீண்டும் கிடைக்க வேண்டும் மற்றும் தமிழகத்தில் சிறந்த நிர்வாகம் நிலவ வேண்டும் என்பதற்காக, அன்புமணி ஜூலை 25 முதல் நவம்பர் 1ஆம் தேதி வரை ‘தமிழக மக்கள் உரிமை மீட்பு பயணம்’ எனும் பெயரில் நடைபயணத்தை மேற்கொள்ள திட்டமிட்டுள்ளார்.
இதற்கான முன்னோடியாக, “உரிமை மீட்க – தலைமுறை காக்க” என்ற வரிகளை உள்ளடக்கிய சின்னத்தை அன்புமணி நேற்று சமூக ஊடகங்களில் வெளியிட்டார். இந்த நிலையில், அந்த பயணத்துக்கு தடைவிதிக்க வேண்டும் என ராமதாஸ் தரப்பில் டிஜிபியிடம் மனு அளிக்கப்பட்டுள்ளது குறிப்பிடத்தக்கதாக உள்ளது.
